Среда, 30 ноября, 2022
spot_img
ДомойНовостиÆхсæнад «Иудзинад»-ы хайад – Алагиры районы

Æхсæнад «Иудзинад»-ы хайад – Алагиры районы

Æхсæнадон змæлд арæзт æрцыд цалдæр азы размæ. Йæ уæнгтæ сты, æцæгæйдæр йæ адæмы фидæнмæ куыдфæндыйы цæстæй чи нæ кæсы, дзыллæйы сомбоныл чи архайы, ахæм уæздан, æцæг ирон лæгтæ, мыггæгты минæвæрттæ. Сё хъæппæрисæй 2014 азы арæзт æрцыд ирон мыггæгты минæвæртты иумæйаг æмбырд. Уым йæ архайджытæ биноныг æмæ рæстаг ныхас бакодтой, ирон адæмы иудзинадыл хорзæрдæм чи ахады, уыцы хъуыддæгтыл: иудзинады иумæйаг мæсыг саразын, кæстæрты хъомылады лыггæнинаг фарстатыл кусын…
Æрæджы республикон æхсæнадон змæлд «Иудзинад»-æн йæ хайад байгом Алагиры районы. Уыцы цауы фæдыл районы сæйраг библиотекæйы уыд кадджын æмбырд. Фембæлды архайдтой змæлды уæнгтæ, Фæрниаты, Хъалæгаты, Хетæгкатæ æмæ æндæр мыггæгты минæвæрттæ, ахуыргæнджытæ, скъоладзаутæ æмæ æхсæнады иннæ минæвæрттæ.
Æмбырды райдайæны уазджытæ æмæ фембæлдмæ æрбацæуджыты зæрдæтæ сæ курдиатæй барухс кодтой Алагиры æртыккæгæм æмæ фæндзæм скъолаты ахуырдзаутæ – равдыстой литературон-музыкалон композици, кастысты, нæ ирон поэттæ фыдæлтыккон æгъдауыл, Ирыстоныл цы зæрдæмæхъаргæ æмдзæвгæтæ ныффыстой, уыдон. Акодтой ацы темæмæ гæсгæ ирон зарджытæ. Сæ алкæй архайд дæр уыд зæрдæмæдзæугæ. Иронау куыд аив дзырдтой фæсивæд, уымæй бæрæг уыд, ирон æгъдау, æфсарм сæ зонд æмæ уæнджы фидарæй кæй бады, уый. Уый фæрцы та нæ кæстæртæ цард æмæ рæстæджы галиу митæн сæттын кæй нæ бакомдзысты, уый дызæрдыггаг никæмæ фæкаст. ОБМЕН1
Уый фæстæ æхсæнадон змæлд «Иудзинад»-ы хæстæ æмæ нысанты тыххæй радзырдта организацийы советы координатор Кучиты Батрадз. Кучийы-фырт куыд загъта, афтæмæй æвæстиатæй æмдых æмæ æмзондæй бацархайын хъæуы ирон мыггæгты иудзинадыл, фæсивæды раст хъомыладыл… Цæмæй, зæгъы, фидæнмæ нæ каст ныфсджындæр уа æмæ фæсмойнаг мацæмæй фæуæм, уый тыххæй.
Фембæлды ма ирон æгъдæуттё æмæ æхсæнады ныртæккæйы уавæры тыххæй сæ хъуыдытæ загътой æмæ фæндæттæ бахастой нывгæнæг æмæ æхсæёнадон архайæг Хетæгкаты Таймураз, змæлд «Иудзинад»-ы советы уæнгтæ Мæрзойты Тамерлан æмæ Фæрниаты Эльбрус, Хъалæгаты Батрадз, ахуыргæнæг Æмбалты Тамарæ, филологон наукæты кандидат Мзокты Аслæнбег, змæлд «Иудзинад»-ы Алагиры районы хайады сæрдар Токты Валодя æмæ иннæтæ. Уый фæстæ æхсæнадон змæлд «Иудзинад»-ы Кады гæххæттытæ радтой районы библиотекæйы кусджыты къорд æмæ фембæлды архайæг скъоладзаутæн.
Кæронбæттæны Алагиры районы сæйраг библиотекæйы сæргълæууæг, РЦИ-Аланийы культурæйы сгуыхт кусæг Магкæты Тамарæ æхсæнадон змæлд «Иудзинад»-ы уæнгтæён балæвар кодта ирон æгъдæутты тыххæй мидисджын чингуытæ.
ГАСАНТЫ Валери

СТАТЬИ ПО ТЕМЕ

ОСТАВЬТЕ ОТВЕТ

Пожалуйста, введите свой комментарий!
Пожалуйста, введите ваше имя здесь

Лимит времени истёк. Пожалуйста, перезагрузите CAPTCHA.

ПОПУЛЯРНЫЕ СТАТЬИ

ПОСЛЕДНИЕ КОММЕНТАРИИ